KALIBO, Aklan—Ginpabugae it Office of the Municipal Agriculture sa banwa it Kalibo nga madali eon lang magbukas ro double A standard nga slaughterhouse it banwa.
Suno kay Municipal Agriculturist Uriel Las Piñas nga nakataeana nga magpatigayun it dry-run sa operasyon it slaughterhouse sa Oktobre 6.
Raya sigon hay libre sa tanan nga gustong magpakatay it baboy.
Ro proyekto hay nabilog sa idaeom it Public-Private-Partnership (PPP) kung siin kapartner it LGU ro Philippines Slaughterhouse Management Office nga nakabase sa Batangas.
Samtang, pagaplantsahon pa sigon it technical working group ro mga sueondanan para sa bilog nga operasyon it pasilidad.
Nasayuran nga may kwalipikasyon ro National Meat Inspection Service pag-abot sa operasyon it slaughterhouse angot sa tama nga pagkatay it baboy.
Kung double A standard sigon ro slaughter house mas masiguro ro kalidad it mga karne kamana man nga pwede rayang maibaligya sa anumang parte it nasyon.
Samtang, ro mga baboy nga halin sa ibang banwa hay kinahang-ean nga mag-agi sa double A standard slaughterhouse antes maibaligya sa mga talipapa ag merkado publiko it Kalibo.
Nasayuran nga raya eon ro ikaywang slaughterhouse nga double A standard sa bilog nga probinsya it Aklan nga ginpangunahan it banwa it Ibajay.
Target man it LGU nga maging triple A ro slaughterhouse sa maabot nga mga dinag-on para pwedeng maibaligya ro mga karne sa guwa it nasyon.
