KALIBO, Aklan — Namatay ro sangka eaeaki matapos nga mahueog halin sa puno it santoe nga anang ginsaka para kunta nga ibutang nga pangpa-aslum sa kinilaw nga isdang bolinao sa Brgy. Tigbauan, Madalag, agahon it Huwebes, Agosto 1.
Nadaea pa sa Madalag District Hospital ro biktimang si Margarito Nama, 60, sangka mangunguma ag residente it nasambit nga lugar matapos nga mabagok ro anang ueo.
Base sa report, ginsaka it biktima ro puno it santoe agud nga mag-ipo it bunga matapos nga maisipan nga kilawon ro anang ginbakae nga bolinao.
Apang, posible sigon nga kat sa mataas eon imaw nga parte it puno hay nakatapak raya sa sangka gabok nga sanga ag nahueog.
Ginpahayag dugang nga unang tumama ro anang ueo sa pagkahueog halin sa puno nga naging rason it anang pagkamatay.
Ro insidente hay padayun pa nga gina-imbestigahan it Madalag Municipal Police Station.
