KALIBO, Aklan—Nagisa ro representante it ECOS sanitary landfill and waste management corporation sa session it sangguniang bayan it Malay sa pagtalakay sa problema sa basura sa isla it Boracay.
Raya hay bangud nga nagatuga eon it perwisyo ag paeag sa ikamayad nga eawas it mga residente ag estudyante nga maeapit sa centralize Material Recovery Facility (MRF) sa Brgy. Manocmanoc sa isla ro nakatambak nga basura.
Sa nasambit nga session, nagpangayo it pasaylo ro representante it ECOS nga si Alex Carlo Magno.
Nauna kara, nagpaabot it andang sentimiento sa session ro mga school heads it Manocmanoc Elementary School ag national high school, kun sa siin andang ginpahayag nga kada domingo hay may kahigayunan nga nagakansela sanda it klase bangud sa indi matakuran nga mabaho nga hugum it basura.
Sa kamatuoran hay may pilang estudyante ro nakaexperiensiya it pagbuyog it ueo ag pagpaeanuka bangud sa mabahong hugum.
Ginasugid nga sa pag-umpisa it kontrata sa tunga it LGU-Malay ag ECOS ko 2019 nga magabuhay it limang, pauman-uman sigon ro pag-eabag it kompaniya sa kasugtanan partikular ro unavailability it barge kamana man ro kawad-an ukon samad ro andang garbage truck nga nagahakot it mga basura paagto sa mainland Malay.
Raya hay sa pihak nga updated ro pagbayad kanda it LGU.
Ginkumpirma it Municipal Environment & Natural Resources ukon MENRO Malay nga ko nagtaliwan nga domingo ro andang ulihing payment nga naga abot sa P2 milyon pesos para sa buean it Pebrero.
Kabilugan nga masobra sa P100 milyon pesos eon ro natigayon nga mabayad it munisipyo sa kompaniya.
Sa hangkat nga kon masarangan it kompaniya nga mahakot ro tanan nga mga basura sa MRF sa sueod it 45 diyas, owa nagtau it komento ro representante it ECOS sa baylo ginhambae kara nga paga-istoryahon pa nana ro mga big boss.
Samtang, ginsuhestiyon ni SB member Alan Palma Sr., nga importante nga ma-review it LGU ag SB ro kontrata nga ginsueod sa ECOS.
Nasayuran nga ginakolekta it dump trucks it ECOS ro basura sa collection points sa barangay it Yapak, Balabag, ag Manocmanoc antes nga igabiyahe sa staging area sa Manocmanoc sa MRF nga dayun nga iga-karga sa barge patabok sa Sambiray Port sa mainland Malay.
Ginaboebanta nga 40 hasta 60 tonelada it basura ro ginahakot halin sa boracay adlaw adlaw ukon katumbas it 20 hasta 30 nga ka garbae trucks nga ginkontra man it MENRO base sa andang record nga 10 eamang.
