KALIBO, Aklan—Excited eon ro mga Filipino-Americans sa pag-atubang it Boston Celtics ag Golden State Warriors sa NBA Finals.
Suno kay Bombo International Correspondent Greg Aguilar nga gina-abangan ag ginasuportahan it mga taga-California, USA ro GSW nga naghalin sa San Francisco.
Owa suno kana naila ro taga-California sa Boston Celtics bangud nga mabuhay nga rivalry nanda it LA lakers.
Apang suno kay Aguilar nga gina-idolo man nana si Jayson Tatum maskin nga nagahampang imaw sa Boston bangud nga masyado raya nga close kay Kobe Bryant.
Samtang, liyamado suno kana sa pustaan ro GSW.
Bangud nga ro unang daywang hampang hay pagahiwaton sa San Francisco, pagatinguhaan sigon it Boston nga madag-an ro maskin sambilog it hampang.
Samtang, madahog eon suno kana sa mga NBA fans makaron ro mga ginabaligya nga team uniforms sa bilog nga estado it California.
Mag-eowas kara, grabe man suno kana ro presyo it ginabaligya nga tickets para sa NBA finals.
Ro ring side tickets hay nagabalor it 50,000 dollars ukon katumbas it P2.5 million kun sa siin hay nagakaubusan pa raya.
Mas mahae pa sigon raya kon magbakae sa guwa it stadium nga naga-abot it doble ukon triple ro presyo.
Ro pinakamaeayo suno kana nga pungkuan ukon bleacher hay naga abot man it 500 dollars.
