Madinaeag-on ro ginkasa nga manhunt operation it gintingub nga pwersa it Malay Municipal Police Station ag First Mobile Force Company bangud sa pagka-aresto sa sangka most wanted person sa kasong frustrated murder sa Sitio Malabunot, Barangay Manocmanoc sa Isla it Boracay.
Giinkilaea ro suspek nga si Segondino Maming, 70-anyos ag residente it nasambit nga lugar.
Imaw hay naaresto sa gahum it warrant of arrest nga gindihon it mga otoridad halin sa natungdan nga korte.
Suno sa anang unga nga si Jordan Maming nga nasorpresa sanda sa pag-aresto sa andang ama ko nagtaliwan nga adlaw bangud nga natabu sigon ro insidente kato pang 1999 ukon haeos 25 anyos eon ro nagtaliwan matapos nga maka-engkwentru kara ro biktima nga si Danny Gato nga anda man nga igbata.
Natigayon sigon nga maeab-an it anang ama ro biktima.
Sa andang pagkasayod hay na-settle eon ro kaso rason nga owa nanda ginaeauman ro pag-aresto sa andang ama.
Halin sa Malay PNP hay ginsaylo ro suspek sa detention facility it Kalibo Municipal Police Station para sa safekeeking.
