KALIBO, Aklan — Nagapati si Atty. Harry Sucgang, sangka political analyst sa Aklan nga posibleng gusto eamang ni Pangueong Ferdinand Marcos Jr., nga makipag-kasugot sa pamilya Duterte agud nga mapahumok ro andang baeatyagon.
Raya hay kasunod it naging resulta it 2025 National and Local Elections, kun sa siin nakita it mga Marcoses nga nagapabilin nga mabaskog ro mga Duterte.
Nasayuran nga katunga eamang it mga senador nga gin-endorso it administrasyon ro nagdaog ko nagtaliwan nga eleksyon.
Posible suno kana nga may kahadlok nga nabatyagan si President Marcos nga matuead ro anang kapalaran sa anang ama nga napahalin sa pwesto pinaagi sa people power revolution.
Sa pihak nga parte, engkaso man sigon nga magpasugot sa ginatanyag nga reconciliation ro Pamilya Duterte, mabahoe ro posibilidad nga raya hay matabu eamang kon makabalik sa nasyon si dating Pangueong Rodrigo Duterte nga presenteng nakakulong sa The Hague, Netherlands ag indi eon pagpadayunon ro impeachment proceedings kontra kay Vice President Sara Duterte.
Apang suno kana nga ro nasambit nga mga kondisyon hay imposible eon nga matabu bangud nga ro kaso ni dating President Duterte hay sa hurisdiksyon eon it International Criminal Court ag ro impeachment ni VP Sara hay ginpasa eon sa Senado.
Nagaeaum man si Atty. Sucgang nga mahimo nga maayos it senado ro andang trabaho ag kalipatan ro andang political affiliation agud nga magampanan ro andang ginsumpaan ag mapatuman ro fair trial.
Madumduman nga magkatandem sanday Bongbong ag Sara ko 2022 nga eleksyon, apang nakaangkon it mantsa ro andang relasyon matapos nga mag-resign si VP Sara bilang DepEd Secretary.
Gintawag it pamilya Duterte ro mga nagakatabu kanda makaron bilang mga atake sa pulitika halin sa administrasyong Marcos.
