KALIBO, Aklan — Ginpanginbulahan ni Sangguniang Panlalawigan member Nemesio Neron ro nagapadayun ag mas pa nga ginpabaskog nga kampanya it mga otoridad kontra sa loose firearms ukon mga bukon it rehistradong baril sa probinsiya it Aklan.
Suno kay Neron nga kaeabanan nga ginagamit sa krimen ro mga loose firearms rason nga kinahangean nga mas pa nga tutukan ro pagpatuman it nasambit nga programa .
Bilang chairman it Committee on Peace and Order, masubo suno kana isipon nga maabu ro mga nakumpiska nga bukon it rehistradong armas kun sa siin ro iba sa mga raya hay ginagamit nga self-protection.
Apang dapat sigon isipon it mga naga angkon it baril nga may naga eksister nga Comprehensive Firearms Law nga mabahoe ro multa kon indi ma-comply.
Kadungan kara ro anang pag apela nga isurender ro mga bukon rehistradong baril para malikawan ro makarondaya nga krimen ag indi makasuhan.
Suhestiyon pa nana sa PNP nga pabaskugon man ro pagpa-rehistro sa mga loose firearms ag dugang nga deklarasyon it amnestiya para kara.
Dapat man sigon nga maging mapagbantay ro kabarangayan kontra sa mga indibidwal nga nagahupot it bukon it rehistradong baril eabi eon ro paltik nga mga baril ag i-report eagi sa kapulisan.
