Kalibo Aklan —————-Nagpadaea it sueat kay Malay Mayor Frolibar Bautista ag Aklan Governor Florencio Miraflores ro grupo it mga musikero sa Isla it Boracay agud nga mag-ayo nga pasugtan eun sandang makapatukar it andang banda ag makabalik sa andang trabaho.
Raya hay matapos nga matingga sigon it haeos sang dag-on eun umpisa nga nagpatuman it nagkaeain eain nga quarantine classification sa probinsiya it Aklan bangud sa COVID-19 pandemic.
Suno kay Michael Deniega, representante it mga grupo it musikero sa Isla it Boracay nga sa idaeum it General Community Quarantine (GCQ) hay ginapasugtan ro mga restaurants ag resorts nga magbatun it bisita hasta sa 30 porsiyento it andang kapasidad.
Bangud kara, ginklaro ni Michael nga sandang mga musikero hay una eamang magapuwesto sa sangka parte it establisyemento ag magapatukar it banda.
Ro management man sigon it establisiyemento ro may kinamatarong nga ikontrol ro pagsueod it tawo ag masiguro nga naipatuman ro health protocol ag malikawan ro pag-eapta it COVID-19 virus.
Owa man sigon raya it close contact bangud owa man sanda nagapaeapit sa mga bisita.
Dugang pa kara nga ro andang ginasaligan eamang agud may maibakae it pagkaon adlaw-adlaw hay ro anang pagtrabaho bilang musikero rason nga eubos sandang naga-aray makarun sa tunga it ginapangatubang nga pandemya.
