KALIBO, Aklan—Nailista ro haeos 140,000 nga numero it mga turistang bumisita sa isla it Boracay ko buean it Oktobre.
Base sa ginpaguwa nga datos it Malay Municipal Tourism Office, umabot sa 139,008 ro numero it mga bumisita sa world-class Boracay Islands sa banwa it Malay, Aklan.
Mas mataas raya it 14,517 nga katawo kumpara sa nailistang bumisita ko buean it Setyembre kon sa siin umabot eamang kato sa 124,491 ro bumisita.
Mas mataas man ro nasambit nga datus kumpara sa mga nailistang numero it turista ko Oktobre dag-on 2022 kon sa siin umabot eamang kato sa 135,232 katawo.
Samtang, ro haeos 140,000 nga bumisita sa Boracay ko Oktobre hay ginakaeakipan it 107,961 nga mga turistang halin sa Pilipinas samtang nagaabot sa 29,817 ro numero it mga turistang naghalin sa ibang nasyon.
Samtang, nagaguwa man nga maabong mga overseas Filipino workers ro bumisita sa nasambit nga isla ko nagtaliwan nga buean.
Sandig gihapon sa nasambit nga sa datus, umabot sa 1,230 nga OFW’s ro nagbakasyon sa Boracay nga mas mataas kumpara sa 803 nga bisitang OFW’s ko Setyembre.
Padayon man nga ginaeauman it ahensya ro mas maabo pang mga bisita sa nasambit nga isla sa ulihing daywang buean it dag-on eabi eon sa kasagsagan it Christmas Season.
