KALIBO, Aklan—Nagpangibabaw ro banwa it Nabas sa ginpatigayon nga Higante Contest parade nga sambilog sa mga ginabantayan nga aktibidad sa nagapadayon nga week-long celebration it Kalibo Sto. Niño Ati-Atihan Festival 2025.
Ro andang higante entry nga “Reyna Magdalena” ro nakabaton it P200,000 nga premyo maghalin sa Aklan provincial government.
Ginsundan raya bilang second place it higanteng “Sto. Niño” nga entry it banwa it Kalibo kon sa siin nakabaton man ro lokal nga gobyerno it P150,000.
Nagpangatlo ro “Antigong Lingganay” nga entry mat-a it munisipalidad it Buruanga nga nakabaton it P120,000; una sa ika ap-at nga pwesto ro higanteng “Talibong” it banwa it Libacao nga may kaakibat nga P100,000 ag nagpang lima ro entry it lokal nga gobyerno it Malinao nga higanteng “Cometa” nga nakabaton it P80,000 nga premyo.
Samtang, nakabaton mat-a it P60,000 nga consolation prize ro mga uwa nagdaog nga higante entry it iba pang kabanwahanan.
Nasayuran nga waeong ka banwa eamang ro nagpasakop sa Aklan Higante Contest nga ginpatigayon, adlaw it Huwebes.
Halin sa 11 nga mga entries ko nagtaliwan nga dag-on, waeo eon lang nga banwa ro nagpadaea it andang natungdan nga pinakamanami nga higante para sa selebrasyon it Kalibo Ati-Atihan Festival 2025.
Makaron nga dag-on, ro Higante Contest hay may tema nga “Panubli-on nga Manggad It Akean, Dungog it Bag-ong Henerasyon” nga nagasuporta sa tangible cultural properties it kada banwa sa Aklan nga may katuyuang i-promote ro nagkaeain-eain nga mga produkto ag iba pang cultural products nga ginapabugae it sangka banwa.
