Maeapad ro kaeawran nga nakapalibot sa Pilipinas.
May una nga 36,000 shorelines apang ro asin nga ginagamit it mga pumueuyung Pilipino hay imported halin sa China ag Australia.
Mabuhay eon gali nga naga import it asin ro Pilipinas ag makaron eamang nabulgar ro nasambit nga isyu.
Bukon eamang ro bugas, isda ag asukar kundi pati asin hay gina-import man
Suno sa report, 93 percent it asin ro gina-import it Pilipinas para masabat ro maabu nga pagkinahangean it nasyon .
Kun indi sigon maga-import hay magabagsak ro mga industriya.
maabu ro ginagamitan it asin bukon eamang sa pagkaon kundi pati man sa pag obra it mga bueong, preserba sa pagkaon, fertilizer, pagkaon it mga sapat ag iba pa.
Nabulgar ro isyu sa asin kat gulping nagtaas ro presyo kara.
Ro suggested retail price it rock salt hay P21.75 kada 500 grams samtang P23.00 man sa kada 500 grams it iodized salt.
Dati mabakae eang ro asin it P10 pesos kada sangka tabo sa tindahan apang makaron hay P20 pesos eon.
Bangud sa natabu ngara, pati asin hay gina-import eon.
Pagapabaskugon sigon ro salt industry pinaagi sa Department of Agriculture (DA) ag Bureau of Fisheries and Aquatic Resources (BFAR).
Pagasuportahan it daywang taeatapan ro mga local nga trabahador it asin.
Pagatutukan sigon ro Development it Salt Industry Project para sa mga trabahador it asin sa Ilocos, Western Visayas ag Zamboanga peninsula.
Ro pagpabaskog sa industriya it asin hay nakabaehag sa Republic Act No. 8172 ukon ro Act for Salt Iodization Nationwide (ASIN)
Kabay nga magmadinaeag-on ro pagsuporta sa local salt makers agud nga indi eon mag-import it asin.
Makahueuya nga napalibutan it dagat ro Pilipinas apang nagabakae it asin
Tutukan kunta ro programa nga mabuligan ro local salt makers.
Ro nakasanayang ugali nga pag-import ro nagapatay sa kaugalingon nga produkto.
Ginapatay ro mga lokal nga mangunguma ag trabahador .
Tiempo eon agud nga punduhon ro nakasanayan nga pag import.//
