KALIBO, Aklan – Nagdangop sa taeatapan it Kalibo Municipal Police Station ro sangka 33-anyos nga indibidwal nga residente it Brgy. Andagao, Kalibo ku Hunyo 11 parte sa natabo nga pagpang-scam.
Paathag ni P/Major Willian Aguirre, deputy chief of police ag public information officer it Kalibo Municipal Police Station nga agahon sigon it nasambitan nga petsa hay nagpadaea ro biktima it kwarta nga nagabalor it P6,464 pinaagi sa sangka application para kay sangka Melda Muyot sa nasambitan nga Quality Loan nga online lending application.
Raya sigon nga lending application hay nadiskubre it biktima sa Meta ag naengganyo man imaw magloan.
Pagkasend it kwarta nakabaton sigon ro biktima it mensahe nga ro anang loan hay naka-freeze bangud sa incorrect account.
Ginlaygayan sigon ni Melda Muyot ro biktima nga magdugang pa it P26,000 agud nga ma-unfreeze ruyon.
Nagduda sigon kato ro biktima bangud sa kabahoean it kinahang-ean nga ipadaea kesa sa anang igaloan.
Mag-euwas sa kwarta nagpadaea man ro biktima it mga litrato, valid IDs ag profile details.
Ro nasambitan nga reklamo hay ginforward man it Kalibo MPS sa Regional Anti-Cybercrime Unit bangud nga ro RACU sigon ro may kapas nga magbuyot it nasambitan nga kaso.
Laygay ni Aguirre nga mangin mapagmata ag indi eagi magsalig sa mga applications, indi man eagi magtao it personal information kun uwa navalidate ro paga-padaehan.
