KALIBO, Aklan—Magabaton eon it manugsilimba ro St. John the Baptist Cathedral umpisa sa Lunes nga adlaw, Hunyo. 1.
Raya hay kasunod it pagbutang sa modified general community quarantine ro bilog nga probinsya it Aklan.
Kaangot kara, ginpahayag ni Rev. Fr. Tudd Belandres, Kora Paroko it Kalibo Cathedral nga ro mga manugsilimba hay tanan kinahang-ean nga sa main entrance it simbahan nga naga-atubang sa Kalibo Pastrana park magaagi bangud nga pagaboe-an sanda it body temperature, magatapak sa foot bath ag magahugas it alcohol antes nga makasueod.
Raya hay kaparte eon sigon it new normal nga ginapangatubang makaron nga panyempo tuga it nagapadayon nga epekto it Covid-19 pandemic.
Suno pa kay Fr. Belandres, limitado eamang sa 200 katawo ro makapungko sa sueod it simbahan agud nga ma-practice ro physical distancing.
Apang, inde suno kana magkahawag ro iba bangud nga magabutang sanda it tent ag pungkuan sa guwa it simbahan para sa mga inde mismo makasueod.
May three lanes nga gintaeana sa main entrance it simbahan kon sa siin ro sambilog kara hay fast lane nga intended sa mga senior citizen, person with disabilities ukon pwd’s ag iba pa.
Bangud sa limitado ro makasueod sa simbahan, magadugang it misa ro simbahan para ro mga maulihi hay makasimba gihapon sa masunod nga misa.
Nagpadumdom man sa mga tumueo-o si Fr. Belandres nga maging disiplinado ag kinahang-ean nga magsunod sa protocols para malikawan ro Covid-19.
