KALIBO, Aklan—Umpisa sa March 8 mag-eowas sa March 21 ag 25 it presenteng dag-on hay uwa eon it international flights nga magahugpa sa Kalibo International Airport.
Raya hay suno kay Civil Aviation Authority of the Philippines (CAAP)-Aklan manager Engr. Eusebio Monserate Jr. bangud sa nagapadayon nga epekto it coronavirus infectious disease ukon COVID-19.
Kapin sa 80 porsyento ro nabawas sa volume it mga pasahero nga nagasueod sa probinsya it Aklan nga nagaagi sa nasambitang paeoparan.
Maskin nga bawion pa sigon it gobyerno ro travel restriction sa mga nasyon nga may pinakamaabong kaso it makamaeatay nga sakit kaparehas sa mainland China kaibahan ro administrative region kara nga Hong Kong ag Macau kamana sa South Korea hay mismong ro mga turista eon man ro nagapamalibad nga magpamasyar sa ibang lugar.
Raya hay matapos nga ginmando it andang gobyerno nga magpaidaeom sa self quarantine agud nga inde eon magkalhit pa ro virus.
May kaangtanan kara, maabong empleyado it pribadong sektor ro nawad-an it trabaho kasunod it pagkansela it mga airline companies it andang mga international flights bangud eon man sa kawad-an it pasahero.
Ro mabilin eon lang sigon makaron nga mga flights hay ana it domestic halin sa Clark International Airport ag sa Cebu.
Samtang sa pihak nga parte, ginpasiguro ni Engr. Monserate nga maid-id ro pag-check it Bureau of Quarantine sa mga pasahero partikular sa pagbueo it andang body temperature.
Raya hay agud nga uwa it makaeosot nga pasahero nga may COVID-19 partikular sa domestic flights.
Sa kamatuoran suno kana hay nagpadaea ro gobyerno provincial it dugang nga medical health workers sa paeoparan agud nga magabulig sa pagsikyar sa mga pasahero kamana man para masigurado nga makafill-up ro mga raya it health declaration card.
