KALIBO, Aklan–Kapin sa 15 ka mga panimaeay ro ginpahapa ag nakaangkon it kasamaran tuga it mabaskog nga hangin ag humbak kadungan it selebrasyon it Paskwa sa Brgy. Caano, Kalibo.
Raya hay epekto it shearline kung siin nagtuga it extreme high tide sa lugar.
Suno kay Michelle Tugba, sambilog sa mga apektadong residente nga halin pa ko Biyernes it gabi-i sanda nga naka-eksperyensya it mabaskog nga hangin ag pagtaas it tubi.
Grabe sigon ro andang na-eksperyensyahan kung siin owa eon haeos sanda it tueog sa pagpinamatyag.
Haeos eampas tuhod eon sigon ro tubi sa andang likod it baeay rason nga gin amat-amatan eon nanda it pagpasaka ro andang mga kagamitan kapareho it washing machine.
Indi sigon sanda makadali-dali it bakwit bangud sa kondisyon it andang ama nga sangka paralisado.
Kamana man nga indi nanda basta nga maaywan ro nasambit nga lugar bangud idtu ro andang paeangitan-an.
Samtang, nagpanawagan man raya sa mga natungdan nga mabuligan sanda sa andang sitwasyon.
