Kalibo Aklan——-Nag-abot eon ro 37 nga mga Aklanon Overseas Filipino Workers (OFW’s) nga kaeabanan hay mga seafarers nga na-stranded halin sa Metro Manila .
Kaina it aga-aga hay nagdungka sa pier it Iloilo ro Malasakit Voyage sakay ro kapin sa 180 nga mga OFW bilang kaparte it Balik-Probinsya project it gobyerno.
Kaibahan kara ro mga OFW nga naghinyu nga magpa-repatriate bangud sa problema sa COVID-19 sa bilog nga kalibutan .
Raya hay first batch pa eamang ag eauman nga may mga masunod pang iga-repatriate .
Ginasugid nga 96 pang Aklanon seafarers ro maga-abot sa masunod nga mga inadlaw.
Mag-eowas sa 37 nga mga Akeanon, 34 nga mga OFW ro taga-Iloilo City, 83 ro taga probinsiya it Iloilo, 9 sa Antique, 14 ro taga Capiz, 5 ro sa Guimaras ag sambilog ro taga Bacolod.
Ro nasambit nga mga OFWs hay na-stranded sa Metro Manila sa sueod it masobra eon sa sang buean bangud sa ginapatuman nga Enhanced Community Quarantine.
Suno kay Governor Florencio Miraflores nga maskin nga naka-14 day quarantine ag ginboe-an it swab test sa Manila hay uman ro mga raya nga igapaidaeum sa kaparehong proseso ag engkaso nga mag-negatibo sa panibag-ong swab test hay pwede eon sanda nga maka-uli , apang hugut sa gihapon nga ipatuman ro home quarantine agud nga malikawan ro posible nga infection it COVID-19.
Ginsueang ro mga raya sa Iloilo it PDRRMO-Aklan ag kapulisan sakay it daywang bus ag ginderetso sa Marzon Hotel kun sa siin temporaryo sanda nga magatinir.
Sa pihak nga parte, pagatun-an man it Provincial Government kon paalin nga maka-uli ro mga stranded nga mga Aklanon sa ibang lugar.
Pagapasugtan eamang ro mga naghalin sa mga lugar nga naka GCQ ag owa it local transmission.
Sigurado suno kana nga ro mga stranded sa Metro Manila hay insigidang pagakabigon nga probable case ukon PUM .
Sambilog suno kana sa mga requirements hay ro health certificate sa ginhalinan nga lugar.
