KALIBO, Aklan—Gin-umpisahan eon nga paiwagan it lokal nga gobyerno it Kalibo ro pilang mga nagapangunang karsadahon sa barangay Poblacion pinaagi sa pag-install it mga road solar studs.
Suno kay barangay kagawad Mark Sy it Poblacion, Kalibo ag tagapaghambae ni Kalibo mayor Juris Sucro nga kapin sa 25 pa eamang nga mga road solar studs halin sa 300 nga ginbakae ro natigayon nga mabutang umpisa ko Miyerkules it gabi-i.
Natigayon nga maka-install kara sa Archbishop Reyes St. sa may Magsaysay park ag target nga maka-abot hasta sa Kalibo pastrana park antes ro Opening Salvo it Ati-Atihan festival.
Apang sa masunod nga dag-on hay pagatinguhaan nga madugangan ro mga lugar nga mabutangan kara.
Ro nasambit nga lighting project sigon hay ro pilot project it alkalde.
Ginpaathag nga ro road solar studs hay matsa reflector sa karsada nga nagagamit it LED bilang source it iwag agud nga makabulig ag maging guide it mga motorista nga madali nga ma-identify ro boundaries nga nagatunga sa karsada eabi eon sa gabi-i partikular sa mga madueom nga lugar, maeain ro tiempo ag may brown-out agud nga malikawan ro mga aksidente sa daeanon.
Ginpahayag pa it opisyal nga ro pondo nga gingamit kara hay ro nabilin nga budget sa infrastructure project it dating administrasyon nga naga-abot eon lang sa kapin sa P400,000.
Matipid man raya bangud nga ro power hay nagahalin sa solar panel nga nagakolekta it enerhiya halin sa init it adlaw.
Tuyo pa kara nga mapa-improve ro mga provincial roads sa Kalibo pinaagi sa pag-adopt it mga modernong teknolohiya.
