KALIBO, Aklan—Plano makarun it lokal nga gobyerno it Kalibo nga taw-an it tig P1-million nga budget ro kada barangay it banwa agud may dugang nga pondong magamit sa COVID-19 response.
Suno kay Ex-officio Sangguniang Bayan member ag Pook Punong Barangay Ronald Marte, ro pondo hay pagagamiton para sa pagpatindog it Ligtas COVID center it kada barangay sa Kalibo.
Tuyo sigon kara nga makaangkon it husto nga lugar ukon pasilidad nga pagabutangan it mga naga-ueoli nga Returning Overseas Filipinos (ROFs) ag Locally Stranded Individuals (LSI).
Ginpahayag dugang nga, ginbutang eon man sa annual investment plan para sa makarun nga dag-on nga supplemental budget ro nasambitang pondo.
Kaangot kara, plano kunta it munisipyo nga sa masunod nga dag-on raya ibutang apang nagpamaeabag si Kalibo Vice Mayor Cynthia Dela Cruz ag gin-insister nga itaeana raya makarun nga 2020.
