KALIBO, Aklan — Nakadepende sa Department of Tourism (DoT) Region 6 ro pagdesisyon kon san-o puwedeng magpasueod it mga lokal nga turista sa isla it Boracay.
Suno kay Malay Mayor Frolibar Bautista nga importanteng uman nga maka-operate ro tourism industry agud mabuhinan ro impact it coronavirus disease (COVID-19) pandemic.
Apang, kinahang-ean nga makasunod sa new normal ro mga stakeholders agud malikawan ro paeag it makamaeatay nga sakit.
Naging maayos sigon ro daywang adlaw nga dry run nga nagatuyong makaangkon it tempranong pagpahaom para sa maayos ag eowas nga pagpasueod it mga turista sa oras nga pasugtan eon ro domestic travel.
Dugang pa ni Mayor Bautista nga nagbulig eon sanda it inspection team agud mag-monitor sa ginapatuman nga health ag safety standards sa mga tourism establishments sa isla eabi eon ro mandatory nga pagsuksok it face mask, physical distancing ag pag limita sa numero it mga customer sa sueod it sangka establisimento.
Mag-eowas sa “no registration, no swimming” ag “no utensils, no dine-in” policy, ginapatuman man sa Boracay ro “no booking, no entry” nga sueondanan.
