VALENCIA, Spain — Nagpatigayon it protesta ro libo-libong mga pumueoyo sa Valencia, Madrid ag iba pang lugar sa nasyon it Espanya bangud sa mahinay nga pagresponde ag bulig nga nagaabot sa mga residente kasunod it nag-eontad nga maeapnagon nga pagbaha.
Sa ulihing datos, ginpahayag ni Bombo International Correspondent Ma. Edzel Lamparero-Lopez nga nagaabot eon sa 225 ro nailistang kumpirmadong namatay, 93 pa ro missing ag libo-libong mga saeakyan, kagamitan ag iba pang propyedad ro naeomos sa maeapnagon nga flashflood.
Ginapaninggitan sigon it mga protesters ro andang kaeain it boot bangud sa nawad-an ro mga raya it pinalangga sa kabuhi, propyedad ag pangabuhian kasunod it mahinay nga pagresponde it gobyerno sa tumama nga kalamidad.
Pinaagi sa portesta, ginpahayag it mga raya ro adnang pagkadismaya sa naging sabat it mga awtoridad sa pinakamalala nga kalamidad nga naeksperyensyahan it Espanya sa nakataliwan nga mga dekada.
Ginpahayag dugang ni Lopez nga ginpangunahan it haeos 20 civic groups ro demonstrasyon nga nagatuyo nga ipanawagan ro pagresign it lider it rehiyong Valencia nga si Carlos Mazón.
Ro isyu hay nag-ugat sa alegasyon nga napas-eawan nga magpadaea it red alert sa mga mobile phone it mga residente si Mazón antes umabot ro bagyo nga naging kabangdanan it flash floods ag maeapnagong halit.
Sa pihak it mga kritisismo, gin-insister ni Mazón nga nagpaguwa ro anang taeatapan it pilang paandam sa mga adlaw antes ro pagbaha nga pumatay sa pilang gatos katawo.
