KALIBO, Aklan–Emosyunal nga ginpamalibaran it step-father nga ginpalayas nana ro anang limang nga dag-on nga manak nga babaye matapos nga gina-alegar nga nasamad kara ro andang portable TV.
Raya hay kasunod it nag-viral nga post it sangka netizen nga nagbulig sa unga matapos nga makita nana raya nga nagatinangis sa kilid it karsada sa may Brgy. Bulwang, Numancia, kun sa siin, nag-angkon it nagkaeain-eain nga negatibong reaksyon.
Suno kay Mr. Ryan Lauro nga gin-akigan man lang nana ro unga ag owa ginsakit.
Ginsaway sigon nana ro anang manak ag ginpapatay anay ro TV agud nga indi madisturbo ro nagakatueog nana nga eapsag.
Posibleng ginkoebaan sigon ro unga, apang owa man nasamad ro andang TV.
Gindugang pa kara nga kunta hay owa eon lang ginbutang sa social media ro pagtinangis it anang manak ag deretso nga gindaea sa anang panugangan nga kilaea man sa nasambit nga lugar.
Nasayuran nga ro anang misis hay idtu makaron sa Metro Manila ag nagapabueong sa anang sambilog pang unga nga may cancer.
Sambilog eamang sigon ro andang unga ag lima ro unga it anang misis sa unang asawa, kun sa siin, una sa anang poder makaron.
