KALIBO, Aklan—Lima nga mga banwa sa probinsiya it Aklan ro grabeng naapektuhan it pagbaha daea it bagyong Paeng.
Suno kay Provincial Disaster Risk Reduction and Management Office ukon PDRRMO head Galo Ibardolasa nga ginpaidaeum sa green alert status ro nasambit nga mga banwa kahapon bangud sa madasig ag madaeum nga pagsueong it baha.
Sa mayad nga swerte suno kana ag low tide kat magpanaeasa ro baha rason nga naging madasig ro pag-ilig kara sa dagat.
Partikular nga apektado ro banwa it Libacao, Madalag, Balete, Kalibo, ag Numancia.
Insigida suno kana nga ginmandu ro evacuation sa mga residente bangud sa maeapnagon nga pagbaha.
Naga-abot sa masobra sa 300 nga katawo ro nag-evacuate sa ABL sports complex kabi-i.
Bandang alas-12:00 kaina it tungang gabi-i hay amat-amat nga naghubas ro tubi-baha kun sa siin natigayon nga mabuligan ro mga na-stranded nga mga residente ag commuters partikular sa Bulwang ag Laguinbanua sa Numancia ag Feliciano ag Aranas sa banwa it Balete.
Samtang, pilang pamilya sigon ro unang gin-rescue nga naga-istar sa bakueod sa Badiangan, Banga kamana man sa Purok 3 Tinigao.
Pinakarason sigon it baha hay ro pag eapaw it Aklan river ag Hae-o river.
Sa pihak nga parte, nagpatigayon eon it pag-usisa ro andang rapid damage assessment and needs analysis team sa pagtumod it kahalitan ag numero it mga evacuees.
