KALIBO, Aklan—Kumpiyansa ro Malay Tourism Office nga mas pang magataas ro tourist arrivals sa isla it Boracay matapos pasugtan it Inter-Agency Task Force on Emerging Infectious Diseases nga makabiyahe ro mga pamatan-on ag senior citizens nga fully vaccinated sa National Capital Region (NCR).
Nauna eon nga ginhambae ni Malay Tourism Officer Felix delos Santos nga may mabahoe nga epekto sa mga turistang nagabisita ro ginapatuman nga travel restrictions.
Kaabuan sigon sa mga nagbabakasyon sa isla hay puro magpamilya ag mayoriya kara hay taga-NCR.
Bangud kara, ginkalipay it tourism office ro pag-apruba sa point interzonal travel it mga taga-NCR nga may edad 18-anyos panaba kamana man ro 65-anyos nga may comorbidities ag nabdos paagto sa mga lugar nga una sa idaeum it General Community Quarantine ag Modified General Community.
Samtang, umpisa Oktubre 1 hasta 11, 2021, naga abot eon sa 6,925 ro mga turistang nagabakasyon sa Boracay base sa record it Malay Municipal Tourism Office.
Nagapanguna gihapon kara ro taga-NCR nga nakalista it 5,125.
Raya hay ginsundan it Calabarzon nga may 476, Aklanon nga may 475 ag Central Luzon nga may 399.
Nagapabilin nga owa it pagbag-o sa mga requirements ro provincial government it aklan sa mga gustong magbakasyon sa Boracay.
Kaibahan kara ro negatibong RT-PCR tests, roundtrip flight tickets, confirmed accredited hotel booking, health declaration form para sa boracay tourist QR code, S-pass ag government ID.
