KALIBO, Aklan—Gindayaw it mga pumueuyu ag ni Kalibo vice mayor Cynthia Dela Cruz ro kalimpyo ag medyu bag-ong sementeryo it medalla milagrosa sa banwa it Kalibo makaron nga pagdumdum sa pista minatay.
Suno kana nga ginapasaeamatan nana ro St. John the Baptist Cathedral nga imaw ro nagadumaea sa sementeryo.
Kumpara ko nagtaliwan nga mga dinag-on nga mapiot ro daean ag magamo, makaron hay nageapad ag ginpangbo-oe ro mga halimunon ag iba pang bagay nga nagapagamo sa lugar.
Makabig nga raya ro kauna-unahan nga kahigayunan nga nakaangkon it maeapnagon nga paglimpyo kun sa siin nag hire ro simbahan it mga taga limpyo.
Sa pihak nga parte, handum man it bise alkalde nga makaangkon it mga nitso nga masarangan sa boesa agud nga makaangkon it kahigayunan ro tanan nga indi magkalisod sa pagpa eubong sa andang mga mahae sa kabuhi sa nasambit nga sementeryo nga makabig nga presentable .
Sangka pamaagi sigon raya it pagtau it respeto sa mga nagtaliwan eon bangud sa malimpyo nanda nga ginakahimtangan.
