KALIBO, Aklan —- Nakalista it 1,732 nga foreign tourist arrivals sa Isla it Boracay umpisa Marso 1 hasta 24 suno sa Malay Tourism Office.
Suno kay Chief Tourism Operations Officer Felix delos Santos, padayun ro pag-aeabutan it mga dumueuong nga turista umpisa nga ginbuksan ro borders it Pilipinas para sa mga raya umpisa ko Pebrero 10.
Kumpiyansa sigon sanda nga mas pang maga-umwad ro turismo sa isla nga makabulig it mabahoe sa ekonomiya umpisa sa Abril 1, kun sa siin, welcome eon ro tanan nga foreign tourist kaibahan ro mga halin sa visa countries.
Sa record it MTO, sa mga foreign tourists nga nag-abot sa Boracay umpisa ko nagtaliwan nga buean, pinakamaabu kara hay naghalin sa Estados Unidos, ginsundan it United Kingdom, France, Canada, Singapore ag South Korea.
Kadungan it pagpabaskog sa turismo, ginatutukan man it natungdan nga ahensiya it gobyerno ro hugut nga pagpatuman it minimum health protocol.
Ro Covid-19 vaccine certificates eamang ro kinahangean makaron nga i-presentar agud nga makasueod sa Boracay nga owa it anumang restrictions.
Samtang, lomobo pa sa 111,022 ro domestic tourists makaron nga Marso nga mas mataas kumpara sa 80,095 nga nailista ko Pebrero.
Hasta sa makaron hay owa pa it airline companies nga nagkumpirma sa pag-angkon it direct ukon chartered flights halin sa mainland China, South Korea, Macau, ukon Taiwan sa Kalibo International Airport.
