KALIBO, Aklan—Mas preparado ro US sa heatwave kumpara sa Europe.
Suno kay Bombo International Correspondent Greg Aguilar it California, USA nga kaabuan sa mga baeay sa Amerika hay may airconditioning unit bilang preparasyon kada mag-abot ro summer samtang sa Europe ro andang baeay hay kaeabanan nga naka-design sa pagsukoe sa tig-eaeamig kada winter.
Raya ro rason suno kana kon ham-an nga masyadong maabu ro nagkaeamatay sa Europa sa pagtama it grabeng heatwave makaron nga dag-on nga ro temperatura hay naga-abot sa 40 degrees celcius.
Gindugang pa ni Aguilar nga pila sa mga namatay sa heatwave sa US hay ro mga homeless ag palaboy.
Ro gina-obra suno kana it pilang siyudad idtu hay ginabuksan ro andang mga shelter nga may air conditioning unit ag temporaryong ginapa-istar ro mga pumueuyu nga owa it baeay ukon sa kalye nagakatueog ag ginapakaon it libre.
Nagapati si Aguilar nga ro nagakatabu makaron hay tuga it climate change bangud nga antes suno kana nga tumama ro heatwave ko raya domingo sa New York , Boston ag iba pang lugar sa Northeast region it Amerika hay nakaangkon pa it flashfloods sa Manhattan sa New York City ko Lunes kun sa siin uman nga naapektuhan ro andang mga commuters tuga it kawad-an it masakyan nga mga subway trains ukon expressways.
Ginbaha suno kana ro mga subways ag highways bangud sa grabeng pagbubu it uean.
