KALIBO, Aklan—Maskin nga matsa hinangae, apang nagapati si Atty. Plaridel Morania, sangka batikang abogado sa Aklan nga pwedeng makasuhan si dating pangueong Rodrigo Duterte bangud sa anang pahayag nga kinahangean nga pumatay it 15 nga senador agud nga makasueod sa “magic 12” ro kandidato it PDP-Laban sa midterm elections.
Suno kay Atty. Morania nga engkaso nga makaangkon it complainant hay nakadepende eon sa Department of Justice ukon DOJ ro pag-usisa kon may probable cause ro ginhimo nga pagpamaeag.
Apang, kinahangean sigon nga maging madahan si Duterte sa anang mga ginabuhian nga pahayag eabi pa ag abu ro nagapamati , kun sa siin dapat nga may ginasundan nga mayad nga role model ro publiko.
Madumduman nga ginpatigayon ni Duterte ro sunlog sa ginhiwat nga proclamation rally it Partido Demokratiko Pilipino-Lakas ng Bayan (PDP-Laban) sa Club Filipino sa San Juan City ko Huwebes.
Ginpahayag nana nga kon patyon ro 15 nga senador, makaangkon it bakante para sa senatorial bets nga anang gina-endorso.
Nasayuran nga kasong inciting to sedition ag unlawful utterances ro ginpasaka it Criminal Investigation and Detection Group ukon CIDG, adlaw it Martes kontra kay Duterte matapos ro gina-alegar kara nga pagpamaeag sa 15 nga senador nga owa man nana ginpangaeanan.
Suno kay CIDG chief Maj. Gen, Nicolas Torre III, indi dapat nga balewalaon ro makarondaya nga mga pahayag bangud sa posibilidad nga magbunga it kinagamo.
