KALIBO, Aklan—Uwa it water assets deployment ro Municipal Disaster Risk Reduction Management Office (MDRRMO) Kalibo.
Raya hay kasunod sa ginpaguwa nga abiso it lokal nga gobyerno partikular ni Mayor Emerson Lachica nga ginabawaean ro pagpaligos sa mga baybayon ag kasubaan nga sakop it banwa it Kalibo.
Suno kay MDRRMO Kalibo head Terrence June Toriano, ro kapyestahan ni Senior San Juan de Bautista hay sangka religious activity rason nga dapat sa simbahan ta kita maadto ag bukon it sa mga baybayon.
Sandig sa abiso nga ginpaguwa it LGU, hugot nga ginabawaean ro mga pumueoyo nga magpaligos sa mga baybayon ag kasubuan bilang kaparte it selebrasyon.
Raya nga tikang sigon hay kaparte eon it nagapadayon nga measures it gobyerno agud nga matapna eon ro pagkalhit it coronavirus infectious disease ukon Covid-19.
Ginpahayag dugang ni Toriano nga ginatugyan nanda sa mga natungdan nga opisyales it barangay ro pagmonitor sa andang mga pumueoyo bangud nga sa oras nga may matabo nga insidente hay ro officers it barangay ro first responders ag sanda sigon hay magaresponde eamang kon kinahang-eanon gid husto.
Suno pa kay Toriano, ginaprotektahan man nana ro anang tawuhan bangud nga maabong LSI ag ROF’s pa ro ginapaabot nga maga-uli sa banwa it Kalibo kon sa siin sanda ro nagasueang sa mga raya sa point of entry.
