KALIBO, Aklan—Ginpaabot ni Ferdinand Macogue, supervising human resource officer it Civil Service Commission ukon CSC-Aklan nga ro barangay officials nga naka-kompleto it andang term of office ukon tatlong dag-on ag gusto pa nga padayunon ro andang pagserbisyo sa gobyerno hay pwedeng mag-apply para Barangay Official Eligibility (BOE).
Raya hay ginatau sa mga elective barangay officials kapareho it Barangay Captain, Sangguniang Barangay Members, ag Sangguniang Kabataan Chairpersons kamana man ro appointive barangay officials kapareho it Barangay Treasurers ag Barangay Secretaries nga ginbutang it Punong Barangay.
Ro eligibility hay pwedeng magamit sa appointment sa first level positions sa career service ukon equivalent sa sub-prof.
Apang suno kay macogue nga ro eligibility hay sambilog eamang sa qualifications agud nga makatrabaho sa gobyerno.
Samtang, gindugang pa ni macogue nga kon ikaw hay nag-graduate nga may honor sa kolehiyo, pribado man ukon pampublikong eskwelahan hay pwede man nga maka apply it civil service eligibility agud nga makatrabaho sa gobyerno nga indi eon kinahangean nga magbo-oe it eksaminasyon.
Ro mga nag-graduate nga may bachelor’s degree nga summa cum laude, magna cum laude ukon cum laude honors hay pwdeng mag-apply para sa honor graduate eligibility sa ahensiya.
Raya hay katumbas sigon it professional level.
