KALIBO, Aklan—Nataeopangdan ro mabahoe nga pagbag-o sa selebrasyon it kapyestahan ni San Juan de Bautista makaron nga dag-on.
Suno kay MJ Jismundo it Provincial Disaster Risk Reduction Management Office (PDRRMO) Aklan nga uwa haeos it may nag-adto sa mga baybayon ag kasubaan nga sakop it probinsya it Aklan.
Raya suno kana ro resulta it mga abiso nga ginpaguwa it kada lokal nga gobyerno tuga it epekto it coronavirus infectious disease ukon Covid-19 pandemic.
Nakabulig suno kana ro mga advisories nga ginpaguwa it mga municipal mayors agud nga padumdumon ag engganyuhon ro mga pumueoyo nga ipaiway lang anay ro pagpaligos sa mga baybayon ag kasubaan bilang kaparte it nakaangdan nga selebrasyon it kapyestahan ni San Juan de Bautista nga ginasaoeog kada 24 it Hunyo.
Apang sa pihak kara, may una gihapon nga naga-eabag sa ginapatuman nga protocols kon sa siin sangkiri eon lang naeomos ro sangka tatlong dag-on nga ongang babaye sa Brgy. Dongon East, Numancia.
Maswerte suno kana nga natabangan ro onga ag presente raya nga nagapabilin sa intensive care unit ukon ICU it provincial hospital.
Sa kabilugan suno kana hay haeos tanan nga mga pumueoyo hay nagtuman sa executive order nga ginpaguwa it mga natungdan nga LGU’s bilang pangaman sa nasambit nga pandemya.
