KALIBO, Aklan — Kumpara ko nagtaliwan nga mga dinag-on nga mga higanteng pigura it mga ati ro ginparada sa mga nagapangunang karsadahon sa banwa it Kalibo, mga higanteng bagay ro iga-martsa makaron nga adlaw it Huwebes, Enero 16 sa pagahiwaton nga Aklan Higante Contest ag LGU Parade.
Raya ro ginpahayag ni Roselle Ruiz it Provincial Tourism Office.
Nakasugtanan suno kana sa andang ginpatigayon nga meeting kaibahan ro 17 nga LGUs nga ro tema makaron nga dag-on hay “Panubli-on nga Manggad It Akean, Dungod it Bag-ong Henerasyon” nga nagasuporta sa tangible cultural properties it kada banwa sa Aklan.
Suno kay Ruiz nga tuyo it higante contest it provincial government it Aklan nga i-promote ro nagkaeain-eain nga mga produkto ag iba pang cultural products nga ginapabugae it sangka banwa.
Ro mga ‘Higante,’ hay dapat suno kana nga may kataason nga kapin sa 10 feet ag eapad nga 6 feet, nga nakasakay sa sangka platform ukon kariton.
Samtang, halin sa dating 11 nga entries, waeo eon lang nga banwa ro magapadaea it andang natungdan nga pinakamanami nga higante para sa Kalibo Ati-Atihan Festival bangud sa problema sa pondo.
Raya hay ro mga banwa it Libacao, Buruanga, New Washington, Banga, Kalibo, Nabas, Malinao ag Ibajay.
Ro mga LGUs nga owa it entries hay magapasakop sa parada.
Magatililipon ro mga magapasakop sa atubang it ABL Sports Complex sa Capitol Site Kalibo para sa pre-judging it mga entry ag maga-umpisa ro parada bandang ala-1 it hapon.
Ro mga ‘Higante’ hay iga-judge base sa mga kategorya, relevance ukon kaangtanan ag pagsunod it pigura ag disenyo sa tema, Creativity and Originality ukon mga katangiang nagapakita it kakaibang imahinasyon it artist/designer, Artistry ukon aesthetic nga kalidad it pigura ag disenyo, kanami, proporsyon, komposisyon, ag color scheme, pati eon ro epektibo ag creative nga paggamit it props ag materyales, ag overall impact.
Sa pihak nga parte, ro kampeon hay maga-uli it P200,000, ro 2nd place hay P150,000, ag ro 3rd place hay P120,000.// ro 4th place hay makabo-oe it P100,000, ag ro ika-limang puwesto hay P80,000.
Ro mga indi magadaog hay magabaton it P60,000 bilang consolation prize.
