KALIBO, Aklan—Aprubado eon sa ginpatigayun nga regular session it Sangguniang Bayan it Kalibo ro sangka draft resolution angot sa plano nga himuon nga quarantine facility ro mga Day Care Centers sa banwa it Kalibo para sa mga naga-ueoli nga Returning Overseas Filipinos (ROFs) ag Locally Stranded Individuals (LSIs).
Suno sa author it resolusyon ag Kalibo Sangguniang Bayan member Augusto Tolentino, ro nasambitang tikang hay bilang preparasyon it banwa sa gina-eauman nga pag-aeabutan it mas maabo pang ROFs ag LSIs engkaso nga bue-on eon ro 15-diyas nga Modified Enhanced Community Quarantine (MECQ) sa Metro Manila ag kaeapit nga mga probinsya it Bulacan, Laguna, Cavite ag Rizal pagkatapos it Agosto 18.
Ginpahayag dugang nga samtang owa pa ginagamit ro nasambit nga mga edipisyo hay gamiton eon lang anay raya bilang temporaryo nga quarantine facility.
Raya hay para makaangkon it husto nga lugar nga pagabutangan it mga naga-uli nga ROF ag LSI agud malikawan ro posibleng pagtaeapnan it Coronavirus Disease 2019 ukon COVID-19 pandemic.
Samtang, plano man sigon nga magsueat it lokal nga gobyerno it Kalibo sa Department of Education ukon DepEd-Aklan para gamiton ro iba pang classroom it mga eskwelahan bilang quarantine facility samtang owa pa ginapasugtan ro face-to-face classes sa pagbukas it klase sa maabot nga Agosto 24.
