KALIBO, Aklan — Nakiparte ro mga deboto it Black Nazarene sa Aklan sa selebrasyon it Ati-Atihan festival .
Suno kay Truly Flaviano, sangka deboto it Itom nga Nazareno nga raya hay kaparte gihapon it andang pagpatigayon it kaugalingon nga bersyon it translacion.
Bandang ala-1:00 hapon it Miyerkules hay nagpatigayon sanda it sadsad panaad daea ro haeos 6 feet nga replica it Itom nga Nazsareno nga ginsundan it maabu nga mga deboto.
Samtang, dugang pa ni Flaviano nga ginbawae nanda ro pagpunas ukon paghaboy it mga towel sa imahe bangud nga owa sanda it gintaeana nga tagasaeap halin sa ibabaw it andas .
Agud nga malikawan nga makapaeapit sa Itom nga Nazareno hay nagtaeana sanda it mga marshalls sa magtimbang nga parte.
Agud nga mas mabaton ro grasya ag bendisyon it Black Nazarene, gin engganyo nana ro tanan nga magsunod sa localized translacion.
Ro pinaka-highlight suno kana it andang localized Translacion sa Aklan hay sa maabot nga Enero 18 sa banwa it Malinao .
Raya hay paga-umpisahan it sagrado nga misa sa St. Joseph The Worker Parish Church ag pagasundan it foot procession ukon pasanan sa Translacion .
Sa Enero 19 hay pagadaehon ro imahe it Itom nga Nazareno sa Tambuan, Malinao ag makaangkon man it misa ag prusisyon.
Magaderetso sanda sa Enero 21 sa Rosario, Malinao para sa kaparehong aktibidad .
Pagkatapos kara hay makaangkon it motorcade it imahe paagto sa Poeo-poeo Jugas New Washington kun sa siin makaangkon it bisperas prusisyon nga magalibot sa bilog nga Brgy Jugas ag Candelaria sa nasambit nga banwa .
Sa Enero 28 pagadaehon ro imahe it Black Nazarene sa Cauyan, New Washington .
Sa pihak nga parte, ginpahayag pa ni Flaviano nga makaangkon it kahigayunan ro mga deboto it Nazareno sa Isla it Boracay nga makapasakop sa Traslacion sa Enero 31 nga maga-umpisa it alas-8:00 it agahon hasta alas-5:00 it hapon nga magalibot sa bilog nga isla.
Raya hay pagasundan it “misa mayor” sa Our Lady of the Most Holy Rosary sa Brgy. Balabag.
