KALIBO, Aklan—Pwede eon nga magsueod-guwa sa isla it Boracay ro mga trabahador nga fully vaccinated eon maskin nga indi eon sanda makapakita it negative antigen test result.
Suno kay Malay Mayor Frolibar Bautista, kinahangean nga iprisinta it mga trabahador ro andang balidong vaccination card bilang ebidensiya nga nakumpleto eon nanda ro andang 1st ag 2nd dose vaccine kontra sa COVID-19.
Ginklaru pa kara nga ginapasugtan man nga makasueod ro mga magabalik pa para sa andang second dose.
Iga-check man sigon nanda ro masterlist it mga nabakunahan agud nga masiguro nga bukon it peke ro mga vaccination card.
Samtang, ginpaathag ni Mayor Bautista nga gin-require nanda ro antigen test agud nga maprotektahan ro kada sambilog sa deadly virus.
Mag-eowas kara, sangka pamaagi man sigon raya agud nga maengganyo ro iba pang mga workers nga magpabakuna.
Samtang, umani it negatibong reaksyon sa mga kritiko ro pag-require it lokal nga gobyerno it Malay it antigen test sa mga trabahador nga indi eagi makabalik sa isla pagtaliwan it 12 oras halin sa mainland Malay.
Nakataeana suno kana imaw nga magapaguwa it advisory angot kara.
Sa pihak nga parte, bangud nga extended it daywang domingo ro MECQ sa aklan, owa gihapon ginapasugtan ro mga turista sa isla sandig sa guidelines it department of tourism.
Uman nga nagpanawagan si mayor bautista nga maskin nga fully vaccinated eon hay padayun sa gihapon nga magsunod sa minimum health protocol.
