KALIBO, Aklan — Sigidas ro ginahimo nga asphalt patching sa mga lubak-lubak nga karsadahon sa probinsiya it Aklan bilang preparasyon sa pag-host it Boracay sa pilang meetings and events it pagahiwaton nga ASEAN summit 2026 kun sa siin ro Pilipinas ro magatindog nga host country.
Suno kay Engr. Joey Ureta, hepe it maintenance section it Department of Public Works and Highways (DPWH-Aklan) nga target nanda ro zero potholes agud nga bukon it makahueuya sa mga bisita ag turista nga naga-agto sa Isla it Boracay.
Masarangan sigon raya nga maabot hasta sa katapusan it makaron nga dag-on basta nga indi eamang mag-sigidas ro pag-inuean.
Sa makaron hay may pilang portion pa sa Eastern ag Western road section it probinsiya nga owa pa natapos ro road repairs partikular ro pag-ayos sa mga potholes.
Aminado man imaw nga mas pang nag-daeum ag nag-inabu ro mga potholes sa pagpanaeasa it bagyong Tino ag Uwan bangud sa pag inuean ag pagbaha.
Dugang pa ni Engr. Ureta nga sabeag sa andang trabaho ro maeain nga tiempo ag kawad-an it pondo eabi eon makaron nga 4th quarter it dag-on.
Sa ginaboeobanta nga 274 nga potholes halin sa boundary it Capiz paagto sa Brgy. Poblacion Altavas hasta sa banwa it Balete ag Banga hay maabu eon ro andang natabunan.
Presenteng ginatrabaho nanda ro minor patching activities sa pilang sections it western road partikular sa pilang parte it banwa it Numancia, Ibajay, Tangalan ag Nabas.
Suhestiyon nana sa planning and design section nga maid-id nga magpatigayon it site investigation and inspection ag mag-coordinate sa andang departmento agud nga matumod kon anong mga karsadahon ro eubus nga nagakinahangean it repair.
Sa pihak nga parte, plano it DPWH nga i-upgrade ag i-redesign ro karsada sa portion it Bangbang, Balete agud nga malikawan eon ro mga road accident eabi eon ro pagkahueog sa banglid it mga saeakyan.
