KALIBO, Aklan — Uman nga gina-evaluate it Joint Security Control Center ro mga lugar sa bilog nga Western Visayas nga nauna eon nga gintumod bilang election ‘areas of concern’.
Raya ro ginpahayag ni P/Lt. Col. Arnel Solis, tagapaghambae it Police Regional Office (PRO-6).
Madumduman nga gin-classify ko nagtaliwan nga Enero 15 it Commission on Elections (Comelec) ro 16 nga banwa ag sangka siyudad sa Western Visayas bilang “areas of concern” ukon election hotspots angot sa nagahilapit nga national and local elections sa Mayo.
Ro banwa it Calinog sa probinsiya it Iloilo ro naga-isaeahanon nga lugar nga na-classify bilang sa “red” ukon area nga may seryosong armed threats tuga it presensiya it komunistang rebelde sa lugar ukon iba pang grupo.
Ginpahayag ni Solis nga sa makaron hay owa sanda it na-monitor nga mga politiko nga may ginabuytan nga grupo ukon potential armed group nga posibleng gamiton makaron nga election period.
