KALIBO, Aklan—Owa pa it mga nagatuhaw nga pangaean nga magakandidato bilang gobernador it probinsiya it Aklan sa nagahilapit nga midterm elections.
Raya ro ginpahayag ni dating sangguniang panlalawigan member ag political analyst nga si Atty. Harry Sucgang.
Suno kana nga importante ro nasambit nga posisyon bangud sa oras nga mahingaeanan ro potensiyal nga magakandidato hay maeumo eon ro pagtumod kon sin-o ro anang mga kaalyado.
Ginpahayag ni Atty. Sucgang nga may mga espekulasyon nga magapadaeagan bilang vice governor si Balete mayor Dexter Calizo apang owa it klaru ro posibleng makabangga ni governor Joen Miraflores.
Nasayuran nga matunog makaron ro balita nga uman nga magabalik sa politika si dating congressman ag governor Joeben Miraflores agud nga engkwentruhon ro anang igkampod nga si 2nd district congressman Ted Haresco samtang si 1st district congressman Carlito Marquez hay magapadaeagan nga alkalde it banwa it Kalibo ag ro anang unga nga si Jess Marquez ro magabueos sa anang pwesto nga posibleng maka-bangga ni Kalibo mayor Juris Sucro .
Target sigon makaron nga mataw-an it kontra si congressman Haresco agud nga indi raya masyadong makabulig sa kandidatura ni mayor Sucro.
Dugang pa ni Atty. Sucgang nga handum makaron it Tibyog-Akean nga masueod ro Batan ag Makato agud nga eubusan nga madomina ro 17 nga banwa sa Aklan.
Samtang, normal sigon sa politika nga makaangkon it pagsueungguran maskin ro mga mag-igbata bangud sa kanya-kanya nga vested interest.
Dugang pa nga hasta nga owa it may nagadeklara it kandidatura hay maabu pa nga mga last minute changes nga matabu .
Kwarta suno kana ro nagapadaeagan makaron sa pulitika rason nga kon owa it kwarta hay owa it tsansa nga magdaog .
