KALIBO, Aklan—Sa pagsueod it tyempo it tag-uean, maabu eoman nga mga sakit ro posibleng eauman nga magtuhaw.
Sambilog eon kara ro ginakabaeak-an nga kaso it dengue kung siin sambilog ro Western Visayas sa rehiyon nga ginamonitor it Department of Health (DOH) bangud sa nagatinaas nga kaso.
Bangud kara, uman nga nagpadumdom ro Municipal Health Office (MHO)-Kalibo sa mga pumueoyo nga maging responsable ag siguraduhon nga regular nga limpyuhan ro mga lugar nga posibleng istaran it namok ukon kiti-kiti.
Suno kay Marshelle Mary Grace Manalo, Nurse II it MHO-Kalibo, dapat siguraduhon it mga ginikanan nga protektado ro andang unga kontra sa namok nga kontaminado it dengue virus kapareho it pagpasuksok it mahaba nga saewae ukon pajama, paggamit it anti-mosquito lotion ag paggamit it mosquitiro kung nagakatueog.
Mag-euwas kara, kinahang-ean man nga magkaon it mga healthy nga pagkaon agud nga mapabaskog ro immune system.
Engkaso nga makabatyag it sintomas, insigida nga magpa-checkup sa pinakamaeapit nga klinika ukon ospital agud nga matan-aw it doktor.
Ginpahayag dugang nga may posibilidad gihapon nga uman nga makaangkon it dengue ro sangka indibidwal apisar nga nauna eon rayang tinamaan.
Sa makaron, ro Aklan hay nakalista it kabilugan nga 37 nga kaso it dengue kung siin siyam kara hay maghalin sa banwa it Kalibo.
