KALIBO, Aklan — Nag-bisita sa Aklan Police Provincial Office si Regional Director Brig. Gen. Rene Pamuspusan para sa anang command visit.
Suno kay P/Corporal Jane Vega, tagapaghambae it APPO nga raya ro kauna-unahan nga command visit it opisyal matapos nga magpungko sa anang pwesto.
Pag-abot nana bandang alas-11:42 it agahon hay insigida raya nga nagpatigayon it command conference kaibahan ro hepe it nagkaeain-eain nga police stations sa probinsiya.
Ginplastar man sa pueong ni provincial director Esmeraldo Osia Jr., ro anang mga operational at administrative accomplishments eabi eon ro pagtau it hugut nga seguridad sa isla it Boracay nga sangka kilaeang tourist destination sa bilog nga kalibutan ag ro Ati-Atihan Festival nga ginbansagan nga “Mother of All Philippine Festivals”.
Tuyo it anang pagbisita nga matan-aw ro kahimtangan it mga kapulisan sa probinsiya it Aklan, nga kon sa siin, pila sa anang mga gin-inspeksyon hay ro Kalibo ag Malay Municipal Police Station.
Ginpahayag pa ni Vega nga ginataw-an it importansiya ni Pamuspusan ro kalimpyo it sangka kampo ukon sangka municipal police station kamana man ro mga dokumento it mga taeatapan.
Samtang, ginpadumdum ni Pamuspusan sa mga pulis nga maging disiplinado ag magtrabaho it mayad maskin anuman ro ranggo.
Ginpahayag dugang nga indi eon mag-inutang bangud nga bastante eon ro andang sweldo.
Madumduman nga si Pamuspusan hay dating hepe it PNP Headquarters Support Service ag nagbueos kay dating Regional Director Brigadier General John Bulalacao matapos nga magretiro ko nagtaliwan nga Hunyo 27, 2019.
