KALIBO, Aklan — Nagpanawagan ro Sangguniang Bayan it Malay, Aklan kay Pangueong Rodrigo Duterte nga temporaryong ibawae anay ro mga Chinese nationals sa pagbisita sa isla it Boracay.
Suno kay SB member Maylyn “Neneth” Aguirre-Graf nga katuyuan it travel ban sa mga dumueoong nga naghalin sa mainland China nga mapunggan ro pagkalhit it 2019 novel corona virus nga naghalin sa Wuhan, China.
Gin-insister ni Graf nga bukon raya it diskriminasyon kundi kinahang-ean eamang nga ipaathag ag ipaintindi sa mga Chinese tourists nga ro tikang hay temporaryo eamang samtang inde pa ma-solusyonan ro pagkalhit nakakamatay nga sakit.
Sangka kaso eamang sigon it n-CoV sa isla hay samad eon ro Boracay.
Aminado ro opisyal nga eubus kara nga maapektuhan ro industriya it turismo ag ekonomiya it isla, apang kinahang-ean nga amligan ro kapakanan it mga residente, iba pang bisita ag mga stakeholders.
Nasayuran nga haeos 50 porsiyento it 434,175 nga dumueoong turista nga nagsueod sa Boracay ko nagtaliwan nga dag-on hay puro mga Chinese.
