BALITANG Espesyal —- Nauso sa Vietnam ro pagparetoke it dueunggan agud nga tuearon ro mahabang earlobes ni Laughing Buddha sa pagpati nga raya hay makatau it suwerte!
Na-feature it Vietnamese media ro sangka beauty salon sa Quang Ninh nga ginadayo it mga tawo para magpaturok it hyaluronic acid fillers sa andang earlobes para maging pahaba ag matuead raya kapareho it kay Maitreya Buddha ukon mas kilaea bilang Laughing Buddha.
Si Maitreya ukon Laughing Buddha hay kilaeang simbolo it wealth and good fortune sa Asya bangud sa masadya ag healthy kara nga itsura.
Kaeabanan nga naga-display it pigurin kara sa mga baeay agud nga maka-attract it suwerte.
Suno sa sangka salon owner, kaabuan nga nagapaidaeum sa nasambit nga procedure hay mga kaeaeakin-an nga may edad 30 pataas.
Apang bangud nga nagkalhit eon sa Facebook nga nagatau raya it suwerte, pati mga kababayin-an hay nagaparetoke man it andang earlobes.
Nagabuhay it 15 hasta 20 minutes ro procedure ag ginahambae nga safe raya kun pure hyaluronic acid ro pagagamiton.
Bangud sa popularidad kara, nagsueputan eon sa bilog nga Vietnam ro nagkaeain-eain nga salon ag may mga report kan-o eamang nga may mga nakaexperiensiya it impeksiyon sa andang dueunggan.
Raya hay bangud nga indi masaligan ro pilang establisimento nga ginaparetokehan it earlobes.
Nagtau it padumdum ro mga doktor sa Vietnam nga sayuron it mayad ro ipa-obra nga procedure sa andang eawas ag sa mga masaligan nga salon ukon clinic eamang magparetoke.
