KALIBO, Aklan — Kasunod it ginpaguwa nga opisyal nga pahayag it Department of Tourism (DoT) Region 6, ginpasiguro man it Malay Tourism Office nga owa it dapat nga ikabaeaka ro publiko sa nadakpan nga buaya sa baybayon it isla it Boracay ko nagtaliwan nga domingo.
Suno kay Kathrine Licerio, public information officer it Malay Tourism Office nga pirmeng may nagabantay sa kaeawran it isla agud nga masiguro ro kaeowasan it mga tawo ag ginhambae nga ro naispatan nga saltwater crocodile hay makabig nga isolated incident eamang ukon rare occurrence sa lugar.
Raya suno kana ro kauna-unahan nga kahigayunan sa kasaysayan nga may nadakpan nga buaya sa baybayon it isla.
Nagapabilin suno kana nga eowas nga destinasyon ro Boracay sa mga turista.
Insigida sigon nga gin-aksyunan it Department of Environment and Natural Resources (DENR 6) ag local authorities ro hitabu agud nga masiguro ro kaeowasan it tanan nga mga bisita ag residente .
Ro lugar kun sa siin nakit-an ag nadakpan ro buaya hay hugut nga ginabantayan kabulig ro mga wildlife experts agud nga malikawan ro anuman nga posibleng peligro.
Ginadudahan nga ro saltwater crocodile hay naghalin sa kaiping nga mga probinsiya nga kilaea nga naga-alaga it mga buaya ag posibleng gin-anud tuga it mabaskog nga humbak daea it pagpanaeasa it Bagyong Carina ag Habagat.
Madumduman nga maabu ro nakibot eabi eon ro mga taga-Boracay bangud nga sa unang kahigayunan hay may nadakpan nga naga-eangoy-eangoy nga buaya nga nagahaba it waeong talampakan.
Matsa masyadong gaoy eon sigon ro sapat kat malambat bangud sa pag-eangoy sa mabaskog nga humbak.
Sa makaron hay nagapabilin sa Community Environment and Natural Resources Office sa Malay ro buaya ag una sa maayos nga kahimtangan.
