KALIBO, Aklan–Grabe eon ro gintuga nga kalugian it sigidas nga oil price hike sa mga van driver nga nagabiyahe it Kalibo-Caticlan vice versa.
Suno kay Jay Apolido masobra katunga eon ro naduea sa andang kita bangud halin sa dating P700 hasta P800 nga round trip hay nakakaubos eon sanda makaron it P1,500 para sa diesel.
Nag-apela man raya sa mga natungdan nga maghimo it aksyon agud nga mabawasan ro epekto it pagtaas it petrolyo kapareho it pagpasugot nga magpataas sanda it pamasahe.
Haeos P200 hasta P300 eamang sigon ro kaeabanan nanda nga kita sa sueod it sang adlaw nga pagbiyahe.
Matueopangdan nga nauna eon nga nag-anunsyo ro mga kompanya it langis nga makaangkon it bigtime oil price hike hin-aga, adlaw it Martes.
Base sa mga una sa industriya it langis, magapatak sa P6.30 hasta P6.50 ro igataas sa kada litro it diesel.
Samtang, P2.60 hasta P2.80 man ro posibleng igasaka sa kada litro it gasolina.
Sa kerosene, P5.10 hasta P5.30 ro posibleng pagtaas.
