GENERAL SANTOS CITY – Nakilaea eun it mga otoridad ro daywang suspek sa pagpangbaril nga ginkamatay it sangka salon owner sa andang pwesto sa bahin it Daproza Street, General Santos City ku Miyerkules, Enero 15, 2025, bandang 6:55 it gabei.
Raya hay ginkumpirma ni P/Capt. Cyrus Vince Arro it Pendatun Police Station sa pakikipag-angot it Bombo Radyo.
Apisar kara, uwa pa ginsapubliko it mga awtoridad ro mga pangaean bangud padayon gihapon ro andang imbestigasyon ag hot pursuit operation agud madakpan ro mga suspek.
Ginkilaea ro biktima nga si Renante Tampus, 34, residente it Uhaw, Brgy. Fatima sa nasambit nga syudad.
Sumueod sigon ro suspek nga insigida nga gumabot it baril ag nagpa-eupok sa sueod it salon.
Makita sa CCTV footage nga pilang beses pang nagpabalik-balik ro suspek agud masiguro nga gintamaan ro biktima.
Matapos ro pagpamaril it gunman, tumakas raya gamit ro sangka motorsiklo kaibahan ro sambilog pa nga suspek nga nagserbi nga look-out.
Samtang, gindaea man ro biktima sa ospital apang ginbawian it hueam nga kinabuhi.
Narekober sa crime scene ro mga basyo it bala nga al.35 ag Cal .38.
Suno sa imbestigasyon, personal nga alitan ro nakikita nga motibo sa pagpamaril bangud base sa partner it tag-ana it salon, nakabaton eun si Tampus it maabong death threats halin sa mga dating kasosyo sa negosyo.
Sa makaron,padayon gihapon ro hot pursuit operation it mga awtoridad agud madakpan ro mga suspek ag mapasakaan it kasong murder.
