KALIBO, Aklan—Nagapatigayon it nagkaeain-eain nga mga aktibidad ag programa ro Aklan Police Provincial Office ukon APPO para sa selebrasyon it 29th Police Community Relations 2024 makaron nga buean it Hulyo.
Suno kay P/SSgt. Leonelyn Artes, public information officer it APPO nga pila sa mga raya hay ro medical ag dental mission kun sa siin ro mga beneficiaries hay ro mga inunga ag iba pang miyembro it pamilya it mga kapulisan kamana man ro pagpatigayon it seminars and awareness lectures ag ro vlogging competition nga pagapasakupan it 17 nga nagkaeain-eain nga Municipal Police Stations sa Aklan eakip ro mobile force company.
Mag-eowas kara, makaangkon man sigon it shooting competition ag iba pang aktibidad.
Ro 29th PCR Month mkakaron nga dag-on hay may temang ” Ligtas ka sa Bagong Pilipinas”.
Ginpahayag ni PSSgt. Artes nga tuyo it selebrasyon nga mas pang mapabaskog it PNP ro pagpa-umwad sa relasyon kara sa pumueuyu agud nga makabulig sa kampanya kontra sa tanan nga klase it kriminalidad.
Dugang pa nga raya hay sangka importante man nga kahigayunan agud nga mapamayad ro partisipasyon it komunidad sa paglikaw sa mga krimen ag agud nga makabilog it mas mabakod nga pakikipagbueuligan kaibahan ro kapulisan sa mga programang pangkalinungan ag kaeowasan it publiko.
