KALIBO, Aklan—Masobra sa 290 katawo eon ro nagkasakit it dengue sa bilog nga probinsya it Aklan halin ko buean it Enero hasta ko June 6, 2020.
Sa nasambit nga numero, daywa eon ro namatay.
Suno kay Provincial Health Officer 1 Dr. Cornelio Cuatchon Jr. nga bukon eamang it pandemya ro andang ginabantayan sa makaron nga panyempo kundi ro posible man nga pagpanaeasa it sakit nga dengue.
Apang, kon ikumpara suno kana sa nagtaliwan nga dag-on ro kaso sa unang an-om nga buean it presenteng dag-on hay mas manaba raya 76 porsyento.
Suno kana, ko 2019 hay umabot sa masobra sa limang libo ro nailistang kaso it Aklan Provincial Epidemiology and Surveillance Unit (APESRU) it PHO Aklan kon sa siin 23 kara ro mga namatay.
May kaangtanan kara, nagpadumdom sa publiko si Dr. Cuatchon nga inde pagbaliwalaon ro simpleng eagnat, ubo, sipon ag rashes sa eawas bangud nga raya ro mga sintomas nga makit-an sa tawo nga may dengue.
Mas makapamayad suno kana nga magpatan-aw eagi sa doktor ag magpaeksamin it dugo bangud nga hasta sa makaron hay uwa pa it naimbento nga bueong sa dengue.
May bakuna suno kana apang naging kontrobersyal raya sa nasyon rason nga uwa eon raya ginagamit sa makaron.
Ginaeauman nga ro pinaka-peak it dengue hay buean it Agosto rason nga ro tanan hay dapat nga magpanglimpyo sa palibot ag ipractice ro 4S nga ginakeakipan it search and destroy ukon pag-usoy ag pagsamad sa mga ginapamugaran it eamok; seek early consultation ukon insigidang magpacheck-up sa doktor partikular kon may nabatyagan nga sintomas it sakit; self protection measures ukon proteksyunan ro kaugalingon kontra sa sakit kaparehas it pagsuksok it mga light colors nga eambong ag ro may mga mahaba nga butkon; kamana man say yes to fogging ukon suportahan ro mga pausok nga ginapatigayon it health authorities sa komunidad engkaso nga may una nga paeag ukon outbreak it dengue.
