KALIBO, Aklan–Padayon nga ginaproblema sa Barangay Andagao, Kalibo ro natitipon nga basura bangud sa kawad-an it nagahakot nga garbage truck.
Suno kay Punong Barangay Roselyn Dela Rosa nga sa kaabuon it basura nga natitipon kada adlaw it mga pumueoyo hay inde gid haeos tanan mahakot it garbage truck nga andang narequest sa lokal nga gobyerno it Kalibo.
Angot kara, ginaplanuhan nanda nga magbakae it bag-o nga garbage truck bangud nga samad eon ro andang dati agud nga inde eon pagproblemahon ro paghakot it basura.
Madumduman nga maabong residente ro nagareklamo bangud nga nagabaho pa ro basura antes nga mahakot paadto it dumping site.
Samtang sa pihak nga parte, ginklaro ni Punong Barangay Dela Rosa nga ro ongoing construction it karsada sa nasambit nga lugar hay ginapaobra it provincial government nga bulig nanda sa barangay.
Angot kara, nag-apela it pag-intindi sa mga motorista si kapitana bangud nga para man kanda raya agud nga maayos ro andang pag-agi sa nasambit nga karsadahon.
