KALIBO, Aklan–Ginpaathag it National Grid Corporation of the Philippines ukon NGCP nga bangud sa andang ginpatigayon nga regular preventive maintenance activity rason nga nakaangkon it haeos waeong oras nga naka-schedule nga power interruption nga naka-apekto sa pilang mga lugar nga ginaserbisyuhan it Aklan electric cooperative ukon Akelco.
Kaibahan sa andang gina-ayos hay ro nabas sub-station ag mga linya nga naga-konekta sa nabas ag sapian.
Angot kara, nagpangayo it pasaylo si Reagan Alcantara, Lead Specialist it Public Relations department it NGCP sa mga konsumidor it apektadong lugar nga sakop it sub-station it andagao, altavas, lezo ag ibajay.
Gintrabaho suno kana it andang maintenance team ro transformer sa sueod it nabas sub-station samtang ro andang mga linemen hay nagpangbaylo it mga poste, insulator ag ro pagtakod it lightning arrester.
Ro nasambit nga aktibidad suno kana hay bilang kaparte it andang preparasyon agud nga malikawan ro mga brown-out sa makaron nga tiempo it tig-ueuean.
Sa pihak nga parte, gindugang pa it NGCP nga makaangkon man hin-aga nga adlaw it haeos daywang oras nga power interruption umpisa alas- 4 hasta alas 6 it hapon para sa pormal nga pagbalik it normal nga supply it kuryente halin sa panit-an sub-station paagto sa nabas sub-station.
Makaangkon sigon it load transfer ro andagao ag altavas sub station nga gin connect temporaryo sa panit-an pabalik sa nabas sub-station.
Apang engkaso nga maayos eagi ag owa it anuman nga problema nga masumaeang hay insigidang igabalik ro supply it kuryente.
Samtang, aminado man sanda nga kon amat hay nakakaangkon it makadali nga brown-out tuga it indi malikawan nga mga hitabu sa andang linya eabi eon ro pagsueod it mga sawa ukon mga pispis kamana man ro pagtama it mga kilat ag bulador.
Sigidas man sigon ro andang ginpatigayon nga clearing sa mga linya it kuryente.
