Sangkiri eamang nga unga ro gusto it mga kababayin-an makaron sa nasyon base sa datos it Philippine Statistics Authority (PSA).
Base sa datos it 2025 National Demographic and Health Survey (NDHS), bumagsak ro fertility rate sa nasyon, halin sa 4.1 nga unga kada babaye ko 1993 hay naging 1.7 eon lang raya ko nagtaliwan nga dag-on.
Ro 1.7 hay mas manaba pa sa replacement level nga 2.1 para masustine ro presenteng populasyon it Pilipinas.
Bangud kara, ginakabaeak-an it mga opisyal kun magataas pa ro populasyon it nasyon sa masunod nga mga dinag-on.
Ro mga babayeng naga-istar sa siyudad, ro average nanda nga unga hay 1.5 eamang, samtang 2 man sa mga probinsiya.
Pinakamataas ro fertility rate sa Bangsamoro Autonomous Region in Muslim Mindanao (BARMM) nga may 2.4 nga unga kada babaye, kasunod ro Region IV-A nga 1.3 nga unga kada babaye samtang sa National Capital Region (NCR) ag Negros Island Region (NIR) hay may 1.4 nga unga kada babaye.
Nag-abot man sa average nga 3.1 nga unga kada babaye ro nakatapos eamang it elementarya ag high school, samtang mas manaba man ro mga nagkolehiyo.
Maabu man ro nagaka-unga sa edad nga 25 hasta 29, samtang bumagsak man sa 4.9% ro teenage pregnancy kumpara sa mga nagtaliwan nga dinag-on.
Nasayuran sa pagtuon nga nagtaas sa 44.5% ro nagagamit it modernong contraceptive agud nga indi mag-nabdos ro mga misis.
Ginpatigayon ro survey umpisa 2022 hasta 2025 sa masobra sa 30,000 nga kababayin-an nga naga-edad 15 hasta 49 sa bilog nga nasyon.
