KALIBO, Aklan—Kasunod it rambol it mga pamatan-on nga nag-eontad sa Brgy. Tambak, New Washington ko nagtaliwan nga dominggo, nagpaguwa it ordinansa ro barangay council nga ro operasyon it mga establisyimento sa nasambit nga lugar hay hasta eon lang it alas-11:00 it gabie.
Ginpaathag ni Punong Brgy. Lucille Macario nga maskin nahusayan eon ro nasambit nga gulo hay nagpaguwa gihapon sanda it ordinansa agud nga sa pag-abot it nasambit nga oras hay matawhay eon ro lugar.
Mag-eowas kara, nagdugang man it mga tanod nga nagabantay agud nga masiguro ro kaeowasan it mga nagadayo sa kaean-an.
Aminado ro kapitana nga amat-amat paeang nga nagabangon ro mga negosyo sa lugar apang kinahang-ean nanda nga istriktuhan ro oras it andang operasyon agud nga inde eon mauman ro nasambit nga kinagamo.
Ro maga-eabag sa ginapatuman nga ordinansa hay makaangkon it penalidad.
